منيو خامس رمضان (شاى مثلج بالنعناع-سلطة الباذنجان-شوربة البطاطس-تورللى اللحمة -بلح الشام)



على سفرة النهارده هيكون موجود شاي مثلّج بالنعناع، وسلطة الباذنجان والجرجير وشوربة البطاطس، وتورللي باللحمة في الفرن وبلح الشام، وعلى السحور هنقدّم لك زبادي بالعسل والمكسرات.


شاي مثلج بالنعناع


المقادير:
4 كوب شاي مغلي
10 أوراق نعناع أخضر
2 ملعقة كبيرة عصير ليمون
سكر



الطريقة:
1- اخلطي كل المكونات مع بعضها كويس، وسيبيها شوية، وبعد كده حطّي الشاي في الثلاجة، وقبل التقديم على طول ضيفي له مكعبات الثلج، واستمتعي بانتعاش الشاي والنعناع.
سلطة الباذنجان والجرجير


المقادير:
حزمة جرجير مقطّعة
ثمرة باذنجان مقطّعة مكعبات ومقلية
2 ثمرة فلفل رومي مقطعة مكعبات
2 ملعقة كبيرة عصير ليمون
ملعقة كبيرة زيت زيتون
¼ كوب زيتون مخلي
ملح وفلفل



الطريقة:
1- اخلطي الجرجير مع الباذنجان والفلفل الرومي في طبق عميق وقلّبيهم كويس.



2- في طبق صغير؛ اخلطي الليمون والزيت والملح والفلفل مع بعض، وضيفيهم على السلطة.
شوربة البطاطس


المقادير:
4 ثمرة بطاطس متوسطة
ثمرة بصل متوسطة مفرومة
½ كوب بصل أخضر مقطّع شرايح رفيعة
كوب جبنة شيدر مبشورة
3 ملعقة كبيرة دقيق
كوب شوربة فراخ
ملعقة كبيرة زبدة
2 كوب لبن
ملح وفلفل



الطريقة:
1- باستخدام شوكة خرّمي البطاطس، وبعدين اشويها على النار أو حطّيها في المايكروييف لمدة 15 دقيقة، وبعد كده اهرسيها



2- في الوقت اللي البطاطس بتستوي فيه، شوّحي البصلة في الزبدة لغاية ما تدبل، وبعدين ضيفي عليها الشوربة.


3- في حلة تانية؛ سخّني اللبن وضيفي عليه الدقيق وقلّبيهم كويس مع بعض لحد ما يمتزجوا، وبعدين ضيفيهم على الشوربة.


4- ضيفي البطاطس للخليط وقلّبيهم مع بعض، وبعد كده ضيفي الجبنة الشيدر وقلّبيهم على النار شوية لغاية ما الجبنة تسيح، وبعد كده تبّلي الشوربة بالملح والفلفل، وارفعيها من على النار وسيبيها تبرد شوية.


5- اضربي الشوربة في الخلاط شوية، وبعد كده حطّيها مرة تانية على النار علشان تسخن، وبعدين اغرفيها في أطباق التقديم، وممكن تزيّينها بالجبنة الشيدر المبشورة والبقدونس المفروم.
تورللي باللحمة فى الفرن


المقادير:
½ كيلو لحمة مقطّعة مكعبات ومسلوقة
2 ثمرة بطاطس مقطّعة مكعبات
3 ثمرة كوسة مقطعة مكعبات
3 ملعقة كبيرة صلصة طماطم
كوب فاصوليا خضراء مقطّعة
2 ثمرة جزر مقطّعة مكعبات
2 ثمرة بصل مفرومة
مكعب مرقة دجاج
3 كوب شوربة
2 ملعقة زبدة
كوب بسلة
ملح وفلفل



الطريقة:
1- شوحي البصل مع الزبدة على النار، وبعدين ضيفي عليه الخضار وقلّبيهم كويس مع بعض لغاية ما الخضار يذبل، وبعد كده ضيفي الصلصة ومكعب المرقة والملح والفلفل وقلبيهم تاني شوية.
2- حطّي الخضار في طاجن الفرن ووزّعي على الوش قطع اللحمة، وضيفي عليهم الشوربة بالتدريج لغاية ما تغطّي الخضار، ودخّلي الطاجن في فرن ساخن وسيبيهم لمدة 40 دقيقة أو لغاية ما كل الخضار يستوي، وبعد كده طلّعيه وقدّميه.
بلح الشام

المقادير:
1½ كوب دقيق
¼ كوب زيت
كوب ميه
3 بيضات
ذرة ملح
فانيليا
زيت للقلي


الطريقة:
1- اخلطي الميه مع الزيت في حلة، وحطّيهم على النار، وسيبيهم لغاية ما يغلوا.



2- اخلطي الدقيق مع الملح والفانيليا، وبعد كده ضيفيه على خليط الميه والزيت؛ مرة واحدة، مع التقليب السريع، علشان الخليط مايكلكعش منك، وبعد كده اطفى النار عليه.


3- ضيفي البيض واحدة واحدة، وماتضيفيش البيضة التانية إلا لما تتأكدي إن البيضة الأولى امتزجت تماما مع الخليط.


4- حطّي العجينة في القُمع، وقصّيه من تحت، وابدئي قطّعي العجينة بطول الإصبع، وحمّريها في الزيت، ولما لونها يبقى دهبي، ارفعيها من الزيت وصفّيها كويس، وبعد كده حطّيها في الشربات، وبعد كده صفّيها وقدّميها.


5- لتحضير الشربات؛ اغلي كوب سكر في كوب ميه، وبعد كده ضيفي عليه عصير نصف ليمونة وفانيليا، وسيبيه يغلي على النار لغاية ما يبقى قوامه تقيل شوية، وبعد كده اطفي عليه وسيبيه يبرد.
للسحور.. زبادي بالعسل والمكسرات


المقادير:
2 كوب زبادي
2 ملعقة كبيرة عسل نحل
2 ملعقة كبيرة مكسرات مشكّلة مفرومة



الطريقة:
اخلطي الزبادي مع المكسرات وقلّبيهم مع بعض، وبعد كده ضيفي العسل على الوش.
siege auto
شاركى على جوجل بلس

About aml

أنا أمل مؤسسة مجلة جمال حواء ، أعشق التدوين والطهي والقراءة ومتابعة كل جديد فى عالم الموضة والجمال ، وأتمنى أن تنال المجلة على اعجابكم .
    facbook Comment
    Blogger Comment

0 التعليقات :

إرسال تعليق

Related Posts Plugin for WordPress, Blogger...

......................................