منيو سادس رمضان (عصير جزر بالبرتقال-شورربة بطاطس بالكريمة-سلطة بلدى-جمام محشى كبدة-رموش الست)



على سفرة النهارده هيكون موجود عصير البرتقال بالجزر وسلطة بلدي وشوربة البطاطس بالكريمة وحمام محشي بالأرز والكبدة ورموش الست وعلى السحور هنقدّم لك سلطة الجبنة بالعنب..


عصير البرتقال بالجزر

المقادير:

3 حبات كبيرة جزر
3 برتقالات كبيرة 
ثلج


الطريقة:
1- اضربي الجزر والبرتقال في الماكينة المخصصة لهم، لو مش عندك ممكن تشتري عصير الجزر والبرتقال جاهز من محل عصائر طبيعية.



2- حضري كاسات وحطي فيها الثلج.



3- صبي في الكاس نصفه عصير جزر ونصفه عصير برتقال.. ممكن تزينيه بأوراق النعناع الطازجة.



سلطة بلدي

المقادير:

2 ثمرة طماطم مقطّعة مكعبات صغيرة
½ ثمرة بنجر مقطّعة مكعبات صغيرة
2 ثمرة خيار مقطّعة مكعبات صغيرة
½ ثمرة خس بلدي مقطّعة مكعبات صغيرة
3 ثمرة فلفل ألوان مقطّعة مكعبات صغيرة
3 ملاعق كبيرة خل
2 فص ثوم مفروم
عصير 2 ليمونة
½ كوب ماء
ملح وكمون


الطريقة:
1- اخلطي كل الخضراوات مع بعضها، وحطّيها في طبق التقديم.



2- اخلطي الليمون مع الخل والملح والكمون والميه، وحطّيهم على السلطة قبل التقديم مباشرة.


شوربة البطاطس بالكريمة

المقادير:

4 ثمرة بطاطس مسلوقة ومقطّعة مكعبات
بصلة مقطّعة مكعبات
¼ كوب كريمة لباني
1½ كوب لبن
3 أكواب شوربة
بقدونس للتزيين
ملح وفلفل


الطريقة:
1- اخلطي اللبن والشوربة مع البطاطس والبصل، وحطّيهم على النار، وسيبيهم لغاية ما يغلوا، وبعد كده تبّليهم بالملح والفلفل.



2- ارفعي الشوربة من على النار، واضربيها في الخلاط لغاية ما المكونات تتجانس مع بعضها كويس، وبعد كده رجّعي الشوربة في حلة على النار، وضيفي عليها الكريمة، وسيبيها لمدة 5 دقايق على النار، وبعد كده صبّي الشوربة في طبق التقديم، وزيّنيها بالبقدونس.


حمام محشي بالأرز والكبدة

المقادير:

زوج حمام
كوب أزر مصري مغسول ومُصفّى
بصلة كبيرة مقطّعة قطع صغيرة جدا
ملعقة صغيرة بهارات
2 معلقة كبيرة زبدة
عصير 3 ليمونات
2 فص حبهان
ورقة لاورا
ملح وفلفل
كوب دقيق


الطريقة:
1- اغسلي الحمام كويس من جوّه ومن بره بالميه، وانقعيه لمدة ساعة في الدقيق وعصير الليمون.
2- بعد كده اشطفيه كويس جدا بالميه، واعملي فراغ بين الجلد واللحم بحرص شديد بحيث إن الجلد ما يتقطّعش منك.
3- تبّلي الحمام بالملح والفلفل من جوه وبره وبين الجلد واللحم ومنطقة الرقبة، وسيبيه لمدة نصف ساعة علشان يتبّل كويس.
4- في الوقت اللي الحمام هيتبّل فيه، ابدئي في تجهيز حشو الحمام؛ بإنك تقطّعي كبدة الحمام قطع صغيرة جدا، وتخلطيها مع البصلة وتضيفي عليهم البهارات والملح والفلفل وملعقة الزبدة وقلّبيهم كلهم مع بعض كويس.
5- شوّحي خليط الكبدة والبصل على النار لمدة 10 دقايق مع التقليب المستمر، وبعد كده ضيفي عليه الرز، وقلبيهم كلهم مع بعض لمدة 10 دقايق كمان، وبعد كده ضيفي عليهم الميه، وسيبيهم على النار لغاية ما الميه تغلي، وبعد كده هدّي النار، وسيبيه لمدة ربع ساعة علشان الرز يتشرّب ويستوي.
6- ابدئي في حشو الحمام بخليط الرز، وخدي بالك إنك تحشي قلب الحمام، وبين الجلد واللحم ومنطقة الرقبة.
7- اسلقي الحمام بعد ما تحشيه في ميه مغلية مضافا إليها ورق اللاورا والحبهان والملح والفلفل وبهارات اللحمة.
8- سيبي الحمام على النار لمدة 20 دقيقة أو لغاية ما تلاقيه استوى، وبعد كده شيليه وحطّيه في مصفاة ورشّي عليه شوية فلفل أسود.
9- حمّري الحمام في الزبدة والزيت، وبعد كده ارفعيه على مناديل ورقية علشان تتشرّب الزيت، وبعدين حطّيه في طبق التقديم.


رموش الست

المقادير:

1/3 كوب دقيق سميد
½ ملعقة كبيرة بيكنج باودر
3½ كوب دقيق
كوب سكر بودرة
ملعقة كبيرة زبدة
3 بيضات
فانيليا


الطريقة:
1- اضربي السكر البودرة مع الزبدة بالمضرب الكهربائي، لغاية ما الخليط يبقى شكله زي الكريمة.



2- بعد كده ضيفي عليهم البيض والفانيليا مع الاستمرار في الخفق، وبعد كده ضيفي عليهم دقيق السميد وقلّبي الخليط مع بعضه كويس.



3- اخلطي الدقيق العادي مع البيكينج باودر، وبعد كده ضيفي الدقيق على خليط دقيق السميد بالتدريج، مع التقليب لغاية ما تحصلي على عجينة متماسكة تقدري تشكّليها بسهولة.



4- قسّمي العجينة على شكل كور صغيرة، ورصّيها متباعدة عن بعضها في صينية مدهونة بمسحة خفيفة من السمن أو الزيت، واضغطي على كل كورة ضغطة خفيفة، وهاتي شوكة واعملي بيها خطوط متوازية على كل قطعة.



5- دخّليها في فرن ساخن على درجة حرارة 180، لغاية ما تحمر، وأول ما تخرج من الفرن اسقيها بالشربات.



6- لتحضير الشربات؛ اخلطي 2 كوب سكر مع كوب ميه على النار لغاية ما يغلوّا، وبعد كده حطّي عليهم عصير نصف ليمونة ورشّة فانيليا، وسيبيهم يغلوّا مع بعض لغاية ما قوام الشربات يبقى تقيل.


سلطة الجبنة بالعنب

المقادير:

¼ كيلو عنب
½ كوب جبنة فيتا مقطّعة مكعبات
½ كوب خضروات ورقية مفرومة (بقدونس ونعناع)
2 ملعقة كبيرة عين جمل مفروم
ملعقة كبيرة زيت زيتون
ملعقة كبيرة خل


الطريقة:
1- اخلطي كل المكونات مع بعضها وحطّيها في طبق التقديم، وقدّمي معاها عيش محمص.


siege auto
شاركى على جوجل بلس

About aml

أنا أمل مؤسسة مجلة جمال حواء ، أعشق التدوين والطهي والقراءة ومتابعة كل جديد فى عالم الموضة والجمال ، وأتمنى أن تنال المجلة على اعجابكم .
    facbook Comment
    Blogger Comment

0 التعليقات :

إرسال تعليق

Related Posts Plugin for WordPress, Blogger...

......................................